Linux.zn.uz

Ubuntu 9.04 - endi netbuklar uchun ham!

Шухрат Дехканов — Mon, 10 Aug 2009 12:03:19 +0000

Canonical 20 Aprelda Ubuntu 9.04 ni e’lon qildi.

Har safargidek ish stoli hamda server komputerlariga moslangan turlari mavjud. Bundan tashqari, bu safar yana bir yangi tur Ubuntu - Netbook Remix - netbooklarga moslangan versiyasini ham taklif qilingan.

Ubuntu 9.04 ni www.ubuntu.com saytidan saqlab olishingiz yoki CD shaklida yuborishlari uchun buyurtma berishingiz mumkin.

Katta tanaffus

Behzod Saidov — Sat, 20 Jun 2009 12:24:23 +0000

Blog o‘quvchilarining xabarlari bo‘lishi kerak, u yarim yildan beri yangilanayotgani yo‘q… Afsuski, oxirigi oylarda mening bo‘sh vaqtim juda chegaralanganligi, ish va o‘qishdagi ko‘plab o‘zgarishlar tufayli yozishga hech fursat topa olmayapman.

Shunday bo‘lsada, blogga siz yordam berishingiz, hissa qo‘shishingiz mumkin. Agar sizda Linux operatsion tizmi bilan bog‘liq qiziqarli ma’lumotlar, maqolalar, yangliklar bo‘lsa ularni ushbu blogda yozishingiz mumkin. Buning uchun id.uz serverida ro‘yxatdan o‘ting va men bilan bog‘laning.

Mandriva uchun paketlarni onlayn o‘rnatish tizimini

Behzod Saidov — Wed, 03 Dec 2008 07:15:52 +0000

EduMandriva loyihasi “za1Raz” nomli paketlarni onlayn o‘rnatish tizimini taqdim qildi. Tizim PHP da yozilgan dastur va MediaWiki tizimining o‘zaro integratsiyasi yordamida ishlaydi. Uning yordamida foydalanuvchilar o‘zlari xoxlagan dasturni katalogga qo‘shishlari mumkin. Hozircha tizim sinov jarayonida bo‘lsada, allaqachon bir qancha dasturlarni o‘rnatsa bo‘ladi. Masalan, bu dasturlar qatoriga Novell taqdim qiladigan OpenOffice.org paketi (Go-OOo), Opera, Flash 10 kabi dasturlarni ko‘rsatish mumkin. Dasturlar bazasi har kuni to‘ldirib borilmoqda.

Fedora 10

Behzod Saidov — Thu, 27 Nov 2008 16:20:29 +0000

Fedora distributivining 10-versiyasini taqdim qilindi. Distributivga qo‘shilgan yangiliklar juda ham ko‘p bo‘lib, ular haqida quyidagi sahifada o‘qishingiz mumkin:

http://docs.fedoraproject.org/release-notes/f10/en_US/

Debian distributividagi dasturlarning ekran tasvirlari katalogi

Behzod Saidov — Sat, 22 Nov 2008 08:57:06 +0000

Debian GNU/Linux loyihasi distributiv repozitoriysidan o‘rnatish mumkin bo‘lgan dasturlarning foydalanuvchi interfeysini o‘zida ifodalovchi ekran tasvirlari(screenshots) katalogini taqdim qilish bo‘yicha screenshots.debian.net manzilida yangi resursni taqdim qildi. Loyihaning asosiy maqsadi foydalanuvchilarga dastur ishlaganda uning ekranda qanday ko‘rinishi haqida ma’lumot berish hisoblanadi. “Ming bora eshitgandan ko‘ra, bir bora ko‘rgan afzal” qabilidagi g‘oya asosida taqdim qilinayotgan bu resurs hozirda o‘zida Debiandagi 740 ta paketning ekrandagi tasvirini o‘zida jamlagan, yana 23480 ta dasturning ekran tasviri qo‘shilishi kutilmoqda. Ekran tasvirlarini barcha taqdim qilishi mumkin. Sayt administratorlari uni ko‘rib chiqib, so‘ng ommalashtirishadi.

Biror bir dasturning ekrandagi tasvirini http://screenshots.debian.net/package/ manzili orqali ko‘rish mumkin. Masalan, http://screenshots.debian.net/package/dreamchess

UbuntuOpenWeek - Suhbat matni

Behzod Saidov — Wed, 12 Nov 2008 10:23:37 +0000

Bundan oldingi maqolada Ubuntu ochiq eshiklar haftaligi - UbuntuOpenWeek tadbiri haqida, ushbu tadbirda Ubuntu loyihasining asoschisi Mark Shuttleworth ham ishtirok etishi haqida ma’lumot berilgan edi. Mark Shuttleworth bilan o‘tkazilgan ikki soatlik suhbat matnini (ingliz tilida) ushbu sahifada o‘qishingiz mumkin.

Ubuntu ochiq eshiklar haftaligi - UbuntuOpenWeek

Behzod Saidov — Sat, 01 Nov 2008 07:23:48 +0000

Ubuntu distributivining yaratuvchilari 3-noyabrdan 7-noyabrgacha Freenode tarmog‘idagi #ubuntu-classroom IRC kanalida foydalanuvchilar bilan ochiq muloqot o‘tkazishadi. Unda foydalanuvchilar o‘z savollariga javob olishlari, o‘z fikrlarini bildirishlari va takliflar kiritishlari mumkin.

Ochiq muloqotning o‘tkazilish jadvali bilan ushbu sahifada tanishishingiz mumkin. Jadvaldagi vaqtlar UTC bo‘yicha qo‘yilgan bo‘lib, ularga 5 soat qo‘shsangiz Toshkent vaqtini olasiz.
Masalan, Ubuntu loyihasining asoschisi Mark Shuttleworth bilan muloqot 6-noyabr kuni Toshkent vaqti bilan 20:00 da boshlanadi.

Qo‘shimcha ma’lumotlar uchun:
https://wiki.ubuntu.com/UbuntuOpenWeek
https://wiki.ubuntu.com/UbuntuOpenWeek/JoiningIn
https://lists.ubuntu.com/archives/ubuntu-devel-announce/2008-October/000509.html

Ubuntu 8.10 (Intrepid Ibex)

Behzod Saidov — Fri, 31 Oct 2008 15:42:28 +0000

Ubuntu distributivining rasmiy 8.10-versiyasi - Ubuntu 8.10 (Intrepid Ibex) taqdim qilindi. Distributivning serverlar uchun mo‘ljallangan Ubuntu Server, KDE ish stoli bilan taqdim qilinadigan Kubuntu, XFCE ish stoli bilan ishlaydigan Xubuntu va multimediya ma’lumotlarni qayta ishlashga yo‘naltirilgan Ubuntu Studio tahrirlarini ham yozib olish mumkin.

Distributivga juda ham ko‘p yangi imkoniyatlar, yangilanishlar va tuzatishlar kiritilgan bo‘lib, ularning hammasi haqida ushbu sahifada o‘qishingiz mumkin.

Asosiy yangiliklar esa quyidagilar:

Linux 2.6.27, X.Org 7.4;
GNOME 2.24, KDE 4.1.2, XFCE 4.4.2;
Tizimga maxsus guest (”mehmon”) foydalanuvchi qo‘shilgan bo‘lib, u tizimga “mehmon” bo‘lib kirish imkonini beradi. Bu foydalanuvchi uchun maxfiy so‘z kerak emas, uning huquqlari juda kam bo‘lib, u tomonidan yaratilgan fayllar tizimdan chiqishi bilan avtomat ravishda o‘chiriladi;
Endi tizimdagi barcha foydalanuvchilarning uy katalogiga yangi “Private” deb nomlangan katalog qo‘shilgan bo‘lib unga 0700 huquqi qo‘yilgan, ya’ni unga shu foydalanuvchidan boshqa foydalanuvchi murojaat qila olmaydi. Bundan tashqari uning ichidagi barcha fayllar shifrlangan holda saqlanadi;
Tizimning yuklanish vaqti qisqartirilgan.
Tizimni o‘rnatish dasturi dizayni yangilangan;

Debian GNU/Linux 4.0 (r5)

Behzod Saidov — Sun, 26 Oct 2008 08:18:49 +0000

Debian GNU/Linux 4.0 (etch) distributivi uchun yangilanishlar e’lon qilindi.
Undagi 54 ta paketda xavfsizlik muammolari bartaraf etilgan bo‘lsa, 12 ta paketda tizimning barqaror ishlashiga ta’sir qiladigan xatolar tuzatilgan.

Reliz haqida Debian loyihasining rasmiy saytidagi ushbu sahifada o‘qishingiz mumkin.

Buyruqlar satrida bitta oldingi direktoriyaga qaytish

Behzod Saidov — Sun, 12 Oct 2008 12:09:12 +0000

Linux buyruqlar satrida ishlaganda bitta direktoriya(jild)dan boshqasiga o‘tish uchun cd (change directory) buyrug‘i ishlatiladi. Bu buyruq boshlovchi foydalanuvchilar fayl tizimida harakatlanish uchun dastlab o‘rganishi kerak bo‘lgan buyruqlardan biridir. Uni ishlatish juda oson. Masalan, /var/www/html/ direktoriyasiga o‘tish uchun

cd /var/www/html/

buyrug‘ini berasiz. Ya’ni cd buyrug‘idan so‘ng qaysi direktoriyaga o‘tish kerak bo‘lsa o‘sha direktoriyagacha bo‘lgan yo‘lni yozish kerak. Agar u joriy jildda bo‘lsa shunchaki nomini yozish ham kifoya. Bitta yuqoridagi direktoriyaga o‘tish uchun esa

cd ..

buyrug‘i ishlatiladi.

Lekin bitta oldingi direktoriyagachi? Unga qanday o‘tamiz? Ko‘pgina tajribali Linux foydalanuvchilari ham bu savolga darrov javob bera olishmaydi.

Xullas, bundan oldin ishlagan direktoriyangizga

cd -

buyrugi yordamida o‘tishingiz mumkin.Quyidagi buyruqlar ketma ketligiga e’tibor bering:

[behzod@localhost etc]$ pwd
/etc
[behzod@localhost etc]$ cd /var/www/html/
[behzod@localhost html]$ pwd
/var/www/html
[behzod@localhost html]$ cd -
/etc
[behzod@localhost etc]$

Yuqorida dastlab foydalanuvchi /etc direktoriyasida turgan edi. (pwd buyurug‘i joriy direktoriyani ko‘rsatadi). Keyin u /var/www/html direktoriyasiga o‘tdi. cd - buyrug‘i bilan yana bundan oldingi direktoriyaga ya’ni /etc ga qaytdi.

Agar cd.. buyrug‘i ishlatilganida u /var/www/ direktoriyasiga o‘tgan bo‘lardi.

Eslatma: cd - buyrugini cd ~ bilan adashtirmang. cd ~ foydalanuvchining uy direktoriyasiga o‘tish uchun ishlatiladi.